తెలుగు నుడిని మెచ్చుకొనని వాడే లేదు
తెలుగు రాని వాడు తెలుగు వాడే కాడు
నాడులలో మేటి నాడు తెలుగు నాడు
నవరసాల కలల వీడు తేనె గూడు

తెలుగు పలుకు విరిసిన తొలి వెన్నెల పూవు
తెలుగు పసిడి పరువము గల కన్నెల నవ్వు
తెలుగులోని మాధవమే కమ్మని వెన్న
తెలుగు చేతి కందు తీయ మామిడి గున్నా

తిరుగు లేని వీర జాతి తెలుగు జాతి
తిన్ననైన దారి గలది తెలుగు నీతి
తెలుగు గుండెలోన కానరానిది భీతి
తెలుగు లీన సుగుణ శీల తెలుగు నాతి

కవితలకిల తగిన భాష తెలుగు భాష
కలకాలం నిలవాలని తెలుగుకాశ
పలువిధాల కలల పంట తెలుగు భూమి
తెలుగు సుగుణ భూషణముల సార్వభౌమి