రామ భద్ర రారా శ్రీ రామ చంద్ర రారా

తామరస లోచనా సీతాసమేత రారా

ముద్దుముద్దుగా రారా నవమోహనాంగా రారా

అద్దంపు చెక్కిళ్ళ వాడా నీరజాక్ష రారా ||

పట్టరాని ప్రేమ నా పట్టుకొమ్మ రారా

గట్టిగా కౌసల్యా ముద్దు పట్టి వేగ రారా ||

ముజ్జగముల ఆది మూల బ్రహ్మ రారా

గజ్జెలు చప్పుళ్ళు ఘల్లు ఘల్లుమనగ రారా ||

సామగాన లోల నా చక్కనయ్య రారా

రామదాసునేలిన భద్రాచలేంద్ర రారా

రామదాసునేలిన భద్రాచలేశ రారా ||